傻散垃圾投資組合16年10月

現金佔總資產：41.73%

 

股票佔總資產：57.67%

 

本月動作：無

 

後記：我發覺寫左依個傻散記錄之後，時間好似過得快左，還是自己一直好期待月尾既來臨呢？無驚無險又過一個月，股市依然上上落落，並無驚喜，係今日隻友邦突然一插，不過都無乜大影響，我只係用左模擬投資比賽既戶口ALL IN友邦，戶口100萬起點，如果有幸比我賺到10萬我就收手了，應該最少都攞到$200安慰獎吧。話時話，前幾日同女友一齊傾傾下計，佢突然間彈句：『因為你係傻散lo』 我聽到之後比唔到反應，心諗：傻散？唔通知道我身份定講錯ja下？ 然後佢就繼續講傻散傻散傻散，我就知道佢已經搵到我個blog，個種感覺好似比人睇到自己不為人知既一面咁，仲話我好多錯字:( 你幫眼睇下有咩錯字記得同我講，仲有幾個澳門人可能現實識得我，又暗中觀察我既blog，可能暗戀我都唔定，嘻嘻！

朋友的寵物被打靶

         無聊又唔想溫習(其實係偷懶)係度吹下水先，前幾日見到有位朋友有少少唔開心，因為牛熊令佢輸左好多錢，似係大出血，比人打靶打完一隻又一隻，最後佢打左一段感性說話，內容大概都係怪自己太貪，年青人想快嬴快賺大錢，最後得來此惡果。

        我睇完之後表面安撫幾句，其實我登佢開心，咁早知道自己唔適合玩牛熊，已經慳返唔少錢，可能會有人問我點解唔阻止自己朋友玩衍生工具，其實我對每一位玩牛熊既朋友都略略解釋過，但我一定唔會阻止，因為我都唔可以否認有人能夠從中獲利，行行出狀元，可能佢就係投機高手呢？

        突然諗到個問題，困擾左我一陣，假設有人睇過去至14年既報表，計算出該股現在應價值為$5，睇睇現時股價$5，處於合理價要等多陣，股價跌至$4.5，即刻買入自己心頭好，後來再跌至$4，當中公司無任何消息披露，就係慢慢陰跌，然後佢再睇多次過去至14年既報表，確定佢係計到$5，咁現在未即係大大減價？於是佢再加倉，直到15年既業績出左，增長遜於預期好多，現在佢終於知道點解會不停跌。濠賭同渣打都曾經試過咁樣，如果用當時現有既報表去計佢股價，係下跌初至中期就好容易產生一種偽大減價，直至業績公佈先如夢初醒。散戶舊有資料好多，但第一手資料卻少之又少，應該點樣分虛驚定真跌呢？

       

暴飲暴食香港遊

         有假期短短地去香港玩兩日，其實都無乜點plan，主要只係想離開澳門放鬆下(唔係好放鬆，行街行到對腳好似唔係自己咁)，間酒店係天后，所以第一日都係附近飲飲食食，香港d食肆多到阿媽都唔認得，得兩丁友，試唔到幾多間鋪頭，加上女友好細食，所以依兩日我好似垃圾筒，聽日開始又要繼續減肥ORZ 。
       
         有點驚喜係試左分子料理，聽就聽得多，昨日終於食到，唔好以為好貴呀，其實價錢好平民，煮野好似做實驗咁，依度加一滴唔知乜東東，個度放下乜乜化學元素，又有煙又有泡又有氣，視覺效果一流，好唔好食就見人見智。另外必食就係香港D滑蛋，無論係美心MX、大家樂定普通茶記，佢地D炒蛋都煮得好食過澳門，成個旅程就係行到邊食到邊，去到葵涌廣埸真係呆一呆，非常之多人，抱住疲累行左兩圈食左幾串牛雜就閃人返油尖旺，金魚街係我每次到香港必行既地方，睇下貓狗蛇魚我就好滿足，好彩女友都睇得好開心，我幾驚佢話悶，最後行到累，食埋晚餐就走人，其實兩丁友除左食都無乜點洗錢，係買左幾件衫而已，大概係因為香港有既澳門多數都有，所以都費事買咁多野增加不必要負重，有樣奇怪係香港好似周街都係7仔、OK，士多又少(可能旺區問題)，想買枝水都要捱貴貨。總括來說，香港生活好逼、好快，競爭好大，睇得出繁華背後又有另一個故事，女友話佢覺得香港人講野特別快，唔知係未同生活節奏有關！？


感謝首席攝影師幫D食物影相，自問影相奇差，總覺得女人影相特別有一手

傻散垃圾投資組合16年9月

現金佔總資產：42.01% 對比上月跌左小小，主要原因組合股值上升，令總資產增多。

 

股票佔總資產：57.56% 原因同上 

 

本月動作：無 (港交所派息，股息12月先一齊計)

 

後記：又一個月，乜野都無變，不過小弟自8月尾做左個fitness test之後，發覺自己體脂都幾高，決定要操返起個人，每星期都逼自己最少做三日運動，現在已經保持左成個月，12月會再check多次，到時睇下成果:) 至於股票都無乜好講啦，升市講乜都無意思[謎之聲：全靠價值投資大顯神通！]，另外小弟報左名參加大專模擬投資比賽，即係鬥短炒，賭大細，因時間好似得三四個月。10月有幾日假，決定同女友去香港玩，行我最仲意既金魚街:)

傻散垃圾投資組合16年8月

現金佔總資產：42.26% 對比上月跌左小小，主要原因組合股值上升，令總資產增多。

 

股票佔總資產：57% 原因同上 

 

本月動作：無 (工行派左息，股息12月先一齊計)

 

後記：月中已經開左學，上堂一半聽書一半打機，落堂後繼續上進修課程，我比較仲意落手落腳做野，所以進修都係學電工、電子維修之類，始中覺得大學D學系唔係好有興趣，但社會需要又唔係好難讀，咁死死氣都要攞返張沙紙，無論係之前經濟定現在中文系，都好似同電無乜關係，係未好可笑？！好多朋友聽到都笑我白痴，我諗我真係白痴，但白痴都要生存，自己無話對咩特別有興趣，索性一文一武，出到社會總有樣中哇？我只係為唔知自己想點既自己負返少少責任。至於股票都無乜好講，算係上左軌道，但我唔係D長揸一世既人，價靚一定會放，入左袋先算係自己既。死啦，我隻眼比我捽到好紅，唔講啦，各位晚安。

 

 

教人投資，我有一套

學曉以下招式，就可以帶住頭盔教人投資，唔會比人秋後算帳。

1)析即是空、空即是析：只對股票作分析，例如看好XX、XX有潛力等等，明顯看好，卻不提自己持有與否。

2)有價無量：有分析、有買入價，但從不講買幾多，買一手都叫買。

3)有入無出：之前話持有XX，日後卻於組合名單裡失蹤，或者從未提賣出，突然又說早已沽出。

4)真‧激將法：發覺自己買錯股票，就要話有人故意激我、影響我，令我做錯左決定。

5)嬴谷輸縮：賺錢一定要對全世界講，衰左就盡量唔好提，如果有人問起，就叫人目光唔好咁短淺。

6)必殺技-C隱：將買入賣出價、買入賣出時間、百分比通通隱藏，最緊要最緊要必須顯示自己賺左幾多錢，最好填滿耀眼既顏色。

最後，我雖勤習這些招式，但都遇過唔少難題，係度分享下應對方法，等讀者更易於學習

1)如果有人問你過程係點、賺左幾多，你就同佢講：「問得好，果然挑通眼眉，睇你骨格精奇，一定係投資奇才，想了解詳情？現在有本秘笈，只售一路發，另外加錢仲有我親授獨門投資寶典，機會難得，欲購從速。」

2)如果有人問你某股買入價、持有幾多既時侯，你就要小心回答，如果答得唔好，招必殺技就會報廢，你應該答：「作為一個長線兼重視價值既投資者，係唔應該專注於價格，我地要專注於公司既價值，價格每天都在變，唯獨價值永恆不老，唔明？現在有本秘笈，只售一路發，另外加錢仲有我親授獨門投資寶典，機會難得，欲購從速。」

3)如果萬一真係唔小心講左買入價，點知隻股票又唔爭氣，又有人唱衰你，你有幾個方法：(1)條友激我，嚇親我 (2)我買得好少 (3)我早就賣左啦 (4)將隻股票從組合裡消失(PS：唔建議用依個方法，比人捉到就唔好)，最常用一定係(2)/(3)，但如果隻股票爭氣，記住將個持股比例調高，反正無買入價格、時間、比例，任你吹都得。

每季或年尾記得要爆下必殺技，等人睇度你係有「成績」，同埋要經常傳授秘笈，累積下D長期飯票，先可以向財務自由出發。

傻散垃圾投資組合16年7月

話咁快7月就完左，好快就要開學，書要讀，學要返，打後應該無乜時間係度分享什麼，只能繼續更新傻散垃圾投資組合，睇返瀏覽數量最多既都係依類貼，參考又好，想睇我點屎法又好，好多謝你地嚟睇。 如無意外都會繼續用相片，除非部老爺電腦終於玩完，如果覺得張圖太細，可以點擊佢放大 。

現金佔總資產：42.58% 首先，要多謝我地政府慷慨解囊，其次要多謝眾家人既利是仔，因本月是小弟牛一，再細分D就要多謝有幾隻股票派左利息。不過開心還開心，其實我唔贊成派錢，別人看似好好，諗深一層政府只係對火哄哄既經濟加多幾滴油，有次我同朋友講，朋友就話:有得X，你X唔X？，我就無野再講了，因為佢有佢道理，反正D錢唔落我地袋，都會比班官亂花亂用，依個情況下，更係X左先算啦。就好比你有隻股票坐艇，仲要係環遊世界既超級大郵輪，依隻股票既管理層不懂經營，只係識亂洗錢，但你走又走唔到，咁你想唔想佢派息？

 

股票佔總資產：56.89%

本月動作：無

後記：原來我既資產就只有現金同股票，仲有D去旅行用剩既海外貨幣，日後希望可以加多樣，就係樓，我對樓市研究都有一手架！依個暑假我花左唔少時間去研究澳門既經濟，進展都唔錯，就差在幾時可以實踐，至於股票呢，都係一個悶字，所以就唔講咁多啦，至多講一句：傻散垃圾投資組合成員領展創52週新高唔知第幾次，早前放左500股到底揼唔揼春？睇你點睇啦，如果你係食息派，咁都未分勝負既，如果你已經賣出，價又比我高，咁我個500股就輸左比你啦，我好似放乜就升乜咁wo，之前941，341都好似升到洪洪聲，真係要檢討下。今個月好多blogger都有聚會，睇嚟我依個澳門仔都無乜希望可以同人聚，見到大家都話有傾到blogger內容既真實性，令我諗起我個組合其實都欠缺真實性，無辦法啦，考完曬試我先開始寫返blog，就算我現在放個銀行戶口同買賣記錄出嚟，都一樣可以係做假啫，不過唔緊要，長期既更新會令我個組合愈來愈真實，期待之後既買入賣出都可以完整地紀錄係度，等我十年二十年仲有命的話，睇下當年既傻散到底做緊乜。

 

後後記：好多人一見面就問我有冇返工或者去旅行，今個暑假的確無乜搞作，係好多人眼中一定覺得好浪費，我的暑假日常：每日訓到自然醒，嘆個早餐睇下報紙再車女友上班，然後等到中午，陪屋企人飲茶買餸，之後遊山玩水或者訓晏教，有得訓晏教真係好爽，就算讀大學我都堅持將時間表改到可以訓晏教，我諗好多人出來做野之後就無機會再訓晏教。看似平淡生活，其實份外珍貴，或者，依種就係我想追求既理想生活，如果現在就開始過依種生活，以我現有財力好快玩完，所以都係回歸現實，死死氣讀埋大學打份牛工，並且希望依個生活早點來臨，或者到時我會係一個湊仔公:)