教人投資，我有一套

學曉以下招式，就可以帶住頭盔教人投資，唔會比人秋後算帳。

1)析即是空、空即是析：只對股票作分析，例如看好XX、XX有潛力等等，明顯看好，卻不提自己持有與否。

2)有價無量：有分析、有買入價，但從不講買幾多，買一手都叫買。

3)有入無出：之前話持有XX，日後卻於組合名單裡失蹤，或者從未提賣出，突然又說早已沽出。

4)真‧激將法：發覺自己買錯股票，就要話有人故意激我、影響我，令我做錯左決定。

5)嬴谷輸縮：賺錢一定要對全世界講，衰左就盡量唔好提，如果有人問起，就叫人目光唔好咁短淺。

6)必殺技-C隱：將買入賣出價、買入賣出時間、百分比通通隱藏，最緊要最緊要必須顯示自己賺左幾多錢，最好填滿耀眼既顏色。

最後，我雖勤習這些招式，但都遇過唔少難題，係度分享下應對方法，等讀者更易於學習

1)如果有人問你過程係點、賺左幾多，你就同佢講：「問得好，果然挑通眼眉，睇你骨格精奇，一定係投資奇才，想了解詳情？現在有本秘笈，只售一路發，另外加錢仲有我親授獨門投資寶典，機會難得，欲購從速。」

2)如果有人問你某股買入價、持有幾多既時侯，你就要小心回答，如果答得唔好，招必殺技就會報廢，你應該答：「作為一個長線兼重視價值既投資者，係唔應該專注於價格，我地要專注於公司既價值，價格每天都在變，唯獨價值永恆不老，唔明？現在有本秘笈，只售一路發，另外加錢仲有我親授獨門投資寶典，機會難得，欲購從速。」

3)如果萬一真係唔小心講左買入價，點知隻股票又唔爭氣，又有人唱衰你，你有幾個方法：(1)條友激我，嚇親我 (2)我買得好少 (3)我早就賣左啦 (4)將隻股票從組合裡消失(PS：唔建議用依個方法，比人捉到就唔好)，最常用一定係(2)/(3)，但如果隻股票爭氣，記住將個持股比例調高，反正無買入價格、時間、比例，任你吹都得。

每季或年尾記得要爆下必殺技，等人睇度你係有「成績」，同埋要經常傳授秘笈，累積下D長期飯票，先可以向財務自由出發。

總有一天，總有一天，總有一天，回歸價值

          今日無聊開個組合睇下，發現我位老臣子"工傷"終於離傷癒不遠，之前話你係雞肋，係我講錯，點解講錯？唔係因為你股價上升或者令我賺錢，而係你每次都令我想起以前既組合。

          繼「初出茅廬」中既組合之後，其實仲有一個組合，最後先到現在依個，六年時間前後共三個，頭一個係跟風，第二個係價值投資組合，第三個係自己諗既，啦！其實我以前都係一位價值投資者，我讀過書，睇過價值投資大師既blog，我當自己已經係架啦:)，你地講既咩六福、金利來、路勁、工行建行、渣打、澳博、金沙、吉利，我都有持有過架，不過現在已經好少價值投資大師提起啦，以前依D股票好受價值投資者青睞，傾到火紅火綠架，不過最後我個價值投資組合都係爛尾收埸，好彩係爛尾收埸，如果唔係真係蝕死我，爛尾全因大師們幫手，約兩年前佢地筆鋒一轉，整個組合都唔同曬，無人再討論個D股票，出現左一批新既價值指標同新既組合，我見勢色唔對，自己既價值投資組合平均股價都慢慢向下，最後都等唔切收息就清倉，除左"工傷"，因為"工傷"個陣仲賺緊錢，渣打澳博個D更加唔洗講，走慢一日都跌幾千架！最後計埋"工傷"、"不移動"賺既錢，算係打個和蝕少少兼無左年半至兩年時間，諗返起都算撿返身彩。

        現在兩年過去啦，金利來已經跌到$3，路勁依然係$6-7上落，六福吉利上上落落都可能撿到D既(如果你識賣而唔係收息)，渣打澳博就..唔講啦，工行建行都係要識賣先得，我組合個位老臣子已經係經典例子，我既買入價仲要靚過出邊好多價值投資者，因為係佢地買入後繼續跌然後我先買。以"工傷"做個例子，如果我一路揸住收息唔賣，不但要承受好大既跌幅壓力，佢仲要減派息，實際上回報率真係唔高，仲要等等等..等到佢返鄉下，等到依家股價持平，我先賺左息，當然啦，你可以溝貨，然後溝下坐下，總有一天，像這天，都會得到合理既回報，但唔應該歸功於價值投資。我揸左"工傷"咁耐，我都唔明點解要話佢係價值投資股，明明佢就唔係，其實時間已經證明左，現在都無乜人講內銀股啦，但年幾兩年前真係日日講，讚到天上有地下無架！不過係咁架啦，創新高未講lo，跌到殘個D，傻豬，未回歸價值je，總有一天，總有一天，總有一天，佢又會以價值投資股既身份創新高地出現。

        不過呢，雖然"工傷"唔係價值投資股(我認為)， 但佢都係一隻較大型較穩建既波幅股，比起個D高息股已經好多多聲，我見有幾位人兄用高息股做左個組合，仲話每年可以收幾多幾多息，真係羨慕佢地咁有正能量，依D高息股市值細易操控，有D仲係年年借錢派息，一係不務正業，一係業務毫無發展，盈利增長愈來愈少，最慘係想走都唔係咁易，成交額低到無人有，到你想賣個陣就明白架啦。以上都只係我個人睇法，絕對會有錯，只係錯多定錯少，我希望係錯多啦，大家都係散戶，點會想同類死架，開得blog分享就更係想一齊進步，如果交左學費聽埋講座最後都輸到傻下傻下，比著你或我都唔開心啦，希望係我諗多左啦，希望個類高息股真係會有希望。

說出價值

       依幾日客串返舊公司做part time幾日，事關公司有活動，雖然辛苦，但可以同班舊同事做野，的確幾開心，值得既。公司搞活動，一如以往都係車水馬龍，排隊排到打哂蛇餅，客人好似當D貨唔洗錢咁，不停撿撿撿，但明明公司只係減左小小錢兼送下小禮物，客人已經覺得好抵好抵，一輪大亂戰，做到現在先收工，其實我好眼訓，但又想記錄依件事，依種感覺。

        如果你係慳儉既人，一定會說三道四，話依度D野性價比太低，唔會值依個價，而我依D死窮撚，即使出左糧都唔捨得買入邊D野，所以無乜特別感覺，反正自己唔捨得又用唔著，但見D人瘋狂咁買，我都會經常諗『點解？』，注意！唔係有錢人瘋狂買，係連中產或以下既人都會買買買，到底有什麼魅力？就係上年，經過公司既年度大活動，我就找到答案。

       公司每年都會有一兩個大活動，好似今日咁，買野會減下錢送下禮物，然後追尋夢想既人、初創業者、生意佬、或者持住普渡眾生思想既人、又或者都唔知自己做乜既人、又或者渴望成功或想被關注的人，各路人馬係依一日都會使盡渾身解素，佢地既大佬只會問一個問題，如下圖，然後一齊出盡全力做同一件事。

 相信有睇過依套戲既人，都一定會知依句對白，依個咁特別既日子，我簡直係覺得將全澳最頂尖既銷售大佬聚埋一齊，一齊將自己既生意額推上另一個層次，當然啦，做生意同投資一樣係有風險既，大佬其實唔多，佢地說話技巧真係與常人有異，仲有好多方面既細節都增加到佢地既說服力，多得全球既大佬，公司既規範先可以大到咁誇張，所以抵佢地發達。

       有種價值，可以用說話或文字去創造出來，深層點來說，係用說話或文字影響你既價值觀，用一篇又一篇既新聞，一個又一個既例子，一次又一次既實驗，一層又一層既包裝，去話比你知，你無買貴，依樣野係物超所值，係一件好產品，現在唔買你就會走寶，睇完聽完一篇一次既文章或講座，然後你會慢慢覺得自己係所謂既『價值投資者』，又或者開始相信『價值投資』，你無睇錯，係『價值投資』，真正高手係唔會一開始同你講產品，會由宏觀入手，會由你會注重既地方入手，例如你覺得自己既簽名值幾多錢？又或者打正一個大旗號，例如價值投資，你覺得健康值幾錢？你會投放多少資源到健康上？話時話，價值投資真係去到邊都岩用，我唔係指投資方法，係個名，其實每個人都有自己一套價值投資，但絕對會因外界而改變，變好變壞我覺得係可以感受，例如你吸收別人既健康價值投資，身體生理或心理上有變得更健康嗎？又或者你吸收左人地既股票價值投資，咁你買股票賺定蝕呀？依個仲易計啦。

        對於依班高手，我對佢地無乜厭惡感，只係單純覺得佢地好勁，高手最仲意儲人氣，做到教主就最好，瘋狂出書，瘋狂開講座，瘋狂上報紙雜誌，分享心得，教人sell me this pen，話比你地班信徒知乜野先係真正既『價值』，以上幾樣收入來源都十分和味，至於對別人是好是壞，天曉得，反正你情我願，一買一賣都合情合理。

初出茅廬

         近排個市好悶，指數不停係某個區域來回，唔好同我講琴日跌左好多，前前後後無10%以上既跌幅，我係睇唔上眼。至於生活都幾近沉悶，暑假過緊阿伯式退休生活，朝早嘆完早餐就會去圖書館同班阿伯爭報紙睇，睇完報紙又睇下其他書，睇完書就食午餐，食完要不游水跑步，要不睡午教，係寫意既！但作為一個年青人，無理由咁快過阿伯既生活，所以7月我會返舊公司做幾日pt，然後又報左幾個課程讀，依家想學野都有門檻，兩個課程都要面試再篩選先有得讀，希望成功啦，唔係又要繼續過阿伯式生活。

         紀錄完自己依段咁頹廢既生活，要入正題了，今日睇舊相搵到13年既投資組合，貼係度分享下，個投資組合係個年故意cap低張圖做紀念，係要提醒自己一些錯誤。

13年係好年份，係我初出茅廬既年份，係繼同老豆夾錢買6號仔之後首次自主自付買股票，除左依d股票，係依段時間我仲玩左牛熊，當時真係好多野都唔清唔楚，每日都有好多資訊塞入腦，到底應該信邊個好？有出名既blogger推薦股票、有每日更新既財經消息、有各大論壇既討論、有唔同既投資學派，聽講有個學派叫價值投資，望落好似比較正統同合理，然後就深入d了解，又去圖書館借相關書睇，記得有本野人地話係價值投資既聖經，唔記得叫咩，睇完都係一頭霧水，然後慢慢就跟風買股票，睇完人地講之後，自己都覺得合理(貌似被說服了)就去馬，無論正股定牛熊，初初買股票真係分分鐘都睇實，跌少少就覺得肉赤赤，你知架啦，學生哥有幾多錢，撞正13年個陣較深既跌浪，真係幾日就輸一個月零用錢+兼職，咁既心態買股票，結果如上圖一樣，牛熊唔洗講啦，都係輸既，前後我諗輸左八九千左右，因為我死等，等到正股唔蝕咁多先走，走曬之後，個心真係怕，我安慰自己：早D輸好呀，總好過出來做野更有錢之後先學投資，一定輸得仲甘。後來我反覆檢討，開始慢慢消化每個信息，其間一樣有試過深陷險境，但一次比一次好，打後三年其實無乜大風浪，我覺得咁樣唔好，因為依三年我專注唔係點樣賺錢，係點樣唔輸，同初初既我無論想法、投資方法、思考方式都已經有360度改變，要問我屬哪一派，我諗自己係乜派都睇D，但樣樣都學唔足，左拼右拼就有左自己既方法。

       醜野唔怕話比人知，衰左就係衰左，但唔代表衰一世，所以我保持更新投資組合，我對自己既方法好有信心，無論跌市定升市，我相信亦能處之泰然，現在投資組合既規模比三年前大幾倍，總資產近兩年都能保持30%增長，近兩年股票進帳其實不多，無太大波幅，根本無出手機會，主要係我為人節儉，不亂花錢才有這樣的增長。

       最後要奉勸大家唔好玩牛熊窩輪，唔好沉迷於股海每天每分每秒既廝殺當中，因為你個腦轉得再快，都唔夠市場快。仲有，唔好道聽塗說，自己諗清楚自己決定自己負責，唔好不停推翻昨天的我，買賣初衷要堅定，唔好因為一時消息而自亂陣腳，唔好成日做買賣，仗唔可以成日打架，經常調兵遣將會十分傷神。以上都係鬼唔知阿媽係女人，但就總係要叫阿寶出動。

下邊補返兩張圖係關於「友邦之役」，去證明..... 唔多講啦，get到就get到。

友邦一役

         如果你打算係度睇下小弟有咩高深分析，什麼價值呀技術呀乜乜乜乜，咁你可以禁返出去了，依度無諗住會教人什麼，純粹記事給未來的自己回味，更何況小弟不才，無其他blogger數學咁好，又好少會用心去分析公司，多數都係望兩眼就算，恐怕都係誤人子弟多。我個人認為財務報表不宜太深入了解，一來複雜，二來不代表你真的了解該公司，我見更多人都係弄巧成拙。小弟既投資方向之前已經鳩up左三個大主張，有興趣可以望下，但真正操作方法並沒有公開，如果我搵到屬於自己既發達公式，我更係唔會係度分享啦，更何況未搵到呢:)同埋發達無得教人，教你個個可能因為你而發達，因為你要買佢既書睇佢既blog上佢既班，儲夠人氣之後一傳十十傳百，咁筆數自然唔係咁計。當然啦，理財應有既態度，係可以教授既，但一定唔會令你發達，頂多只叫啟發你發達既第一步。

         講下自己點解買友邦之前，要提提有某些媒體唯恐天下不亂，不斷發低質新聞來影響散戶，邊間就唔講啦，我留意左好耐，儲左好多圖，大致都係不停唱淡唱淡唱淡，升又唱淡跌又唱淡，仲有個幾有趣既新聞，例如索羅斯話經濟唔好，準備做淡，港股股災比08更嚴重，另一個就今日暴跌五百點，索羅斯空襲港女。標題嚇一跳，睇完得啖笑，試問有無人會係偷襲你之前警告左你先？基本上近半年都係咁，最可笑係個市同佢既死老豆新聞走勢係完全背馳。大家如果好似我咁無聊，可以留意下D媒體或者財經新聞，有時真係笑到碌地，但我相信實有班傻人會信到十足十，依D新聞會作為佢買賣既推動力。

         買友邦有兩個因由，一個係自己兼職既地方，另一個就係因為個D死老豆新聞。

我唔係好識睇財務報表，初初見到友邦盈利又上又落，對於我依D傻散真係唔明，加上又咁高PE，然後就卻步，直至我係一間賣健康產品既公司上班，我發現左D係財務報表睇唔到既野，係關於公司既制度，保險公司多數都有佣抽，健康產品亦如是，當然佢地會設計一個好動聽既名或者叫獎金既野去代替佣金依兩個字，基本上佢地係同一類型既公司，而入邊亦會分級數，賣得愈多就愈高級，好似我兼職間公司咁，當你做到某一個生意額且保持幾年，打後你唔做野，公司都個個月都出糧比你，看似動聽吧？仲有低成本創業，基本上靠把口就做到生意。無錯！依個係屬於你既生意，年青人，老年人，企業工抑或清潔工，你們該有一個創業夢，現在機會就放係你眼前，低成本高效益....呀！ 對唔住，離曬題了，無辦法，做左年半，依D對白已經植入我腦海，我想講既係公司既分級分團分佣制度，好容易就會形成一種目標，下層會視上層為偶像而不斷努力搵客，上層與上層各團隊又會互相角力，當成為上層分佣又好和味，權力、榮耀、利益有齊曬，誰不心動呢？ 而依個制度既最大受益人唔係上層，我好肯定係間公司本身得益最多，因為做出成績就等同幫公司搵錢，難聽D講句所謂獎金或佣金只不過係公司出糧比你。講到依度你可能會話，邊有咁笨柒講下就會中個頭埋去，我一定唔會lo。但係事實就係去追依個「夢」既人多到你唔信，講多少少，我間兼職公司既市值拍得住一間友邦，可想而知其威力，可想而知友邦既威力。

我文字上已經不能形容比你地聽個種瘋狂，個種對團隊、公司、偶像既崇拜度係瘋狂到你唔信，我見過好多為左追額，真係自己禁錢出來買野，係好誇張睇到O曬嘴。當我了解到依個事實，咁財務報表略略看下便可，只要機會一到，一有個好價位已經可以買入，係2月3日咁岩有個死老豆新聞，話銀聯限額買保險，當時本身已經日日跌，加埋依個消息友邦開市即插6%，真係大好機會，仲要我一查之下，銀聯限額早就存在，即係掘舊屎出來講，二話不說即刻買！ 一買就返唔到轉頭，個半鐘已經有消息傳出限購早存在，然後？ 然後就離我買入價愈來愈遠....眼訓..再見。

給三年後的自己

今日搵野既時候，無意中發現依張已被遺忘很久的信，是巧合還是冥冥中注定呢？今年剛好是三年後的我。依封信恐怕只有我先睇得明，什麼計劃什麼興趣什麼教訓，哈哈！係度要多謝我高中既班主任戴老師，係佢要我地全班都寫封三年後的信比自己，估唔到睇返覺得甚是回味，又覺得好搞笑，咁就三年，時間過得真係快，計劃進行得好順利，興趣已經無左，教訓永不忘記；但陰影，我可以克服。我真係考左車牌，電單車同私家車都有，不過令你失望，我考完半年左右就炒左車，右肘無左一塊肉仔，不過自炒車後我就怕了，現在揸車已經好小心。有冇尋回甚麼？依個blog係我寫依封信之後兩三年先開，所以我仲尋緊，或者最好既已經係我身邊，我大致上滿於現狀，閒時做下運動，搞下小科技，學下新事物，煩下搵工學業，生活尚好，扒龍舟仲有獎攞下，但其實我好怕比賽，自己由細到大都唔仲意競爭，比賽壓力好大，下年想逃避比賽:(

最後，點都要講下個屎，個屎近排升到洪洪聲，其實有貨係手都唔需要有咩動作，反正跌同升都仲有空間，今日個集瑯琊榜梅長蘇講得幾有道理，選擇權係敵人手中是下下之策，相反無論敵人如何選擇時都有應對方案，方能把握大局。現在我個組合+14%，基本上已經形成保護網，屎跌兩三成我都唔會怕，(1)14%先歸零，(2)有充裕現金支援，相反屎再升一兩成我就會考慮走佬了，不過我更希望跌屎，我就係想屎場衝擊我既組合，咁樣先會睇到組合既利弊。恐怕到我要出錢支援既時候，應該已經輸死好多人了。

獎牌比我來說，當中榮耀含量不多，更多的是一起訓練、玩耍的回憶，我害怕比賽，比賽最後階段若要繼續有氣力衝刺，除了意志堅定，還要有憤怒的情緒，要發顛，因為人發顛既時候，腦裡是大致空白且集中於某事情，這樣可以抵抗肌肉超負荷的疲勞或情感上的傷害，所以有時見到有人殺人會不停咁砍，好似停唔到咁，這種情緒往往令我衝線後有種莫名空虛、辛苦、無奈，害怕。

沒有兼職的日子

         約兩個月前收到經理的傳話，說公司已經請了個新移民，所有兼職都要撿包袱走，我當時無唔開心，只係有D唔捨得同擔心，不竟做左年幾，依份兼職我本來打算做足成個大學生涯，可惜事與願違，唔捨得一班好同事，擔心自己既理財長度，無唔開心因為公司依個選擇都好正路，不竟新移民人工比我們低，工時比我們長，亦不用給予正職的福利，所以都係個句，老豆老母成日話比心機讀書或者學一技之長係無錯架，有手有腳就做到既工作，好容易就比人搶走。

         無左份兼職，每個月就少左兩三千收入，一年就少左約三萬六，天啊，上年我搵八萬，今年可能得返五萬左右，然後食啊玩啊全部都要就住就住，失業之後唔知點解覺得出邊食野真係好Q貴，香港既朋友，澳門既物價已經超越左你地幾年，可想像到個物價幾利害，我平時已經無乜點買野，每個月近九成費用都用左係食度，看來真係要諗諗係屋企自己煮。

       無做兼職就自然多左時間，又唔想咁快搵工住，不竟前排考試，現在又要準備龍舟比賽，不過暑假就真係要搵D野搞下，可能搵工，可能學野....都唔知自己興趣係乜，乜都試下啦唯有。過多幾日出五月投資組合表現。

鳩UP投資三主張

(1)廣積糧

其實儲錢係利多於弊，唔單單從投資角度出發，儲落既錢不單可以投資，有起急事都叫有個後盾，萬一唔好彩突然瓜左，學姜大衛講句:留低既都係一份心意，而唔係負擔。而要投資更加唔洗講，股場如戰場，三軍未發，糧草先行，無錢學乜人投資？

我提過身邊好多朋友要儲錢，朋友多數主張及時行樂，又話少少錢儲來都用不上，等出來工作後先儲。我個人唔同意依種諗法，一有起急事唔通問財仔借？，二聚沙可成塔，三儲錢除左真係儲舊錢，仲可以控制人的物欲，學老莊說:五色、五音、五味皆對人有所害，欲望係無限，人既錢係有限，以有涯隨無涯，危險呀！

(2)尋找屬於自己既投資方法

依度無得教你邊種投資方法係最賺錢，發達真係無得教人，教你個個唔會令你發達，不過佢可能會:)

多聽多看，吸收別人的方法，自己再過濾下，搵一套屬於自己既投資方法，然後落場實戰，實戰過程中發現問題就想辦法修正

(3)嘗試懂勢

如果有對既方法，但用係錯既時機，咁都係錯，要準確分牛屎定熊屎，真係好難，但必須嘗試，搵下佢地有咩特徵有咩差異，唔要求真係搵個轉角點，有點距離也不怕，唔好調轉行便可以了。經常聽到人講牛屎呀依家，然後聽日又熊屎，後日又牛屎，過兩日又熊屎，實質就係同一舊屎，只係隨時間有少少發酵，結果就有班人日日係度估佢係邊舊屎

無賴主義

            如果有讀過大學既你地，係大學生涯中總會有唔少Group Project要做，亦都總會遇到幾個對Project不聞不問，踢一踢先郁一郁既隊員，我定義佢地做無賴主義者。

            依D無賴主義者永遠少發聲，亦唔表態，就算聊天群叫佢都好少出現，其實目的就只有一個，就係想自己負責得最少，佢地最想自己剩係撿頭撿尾，然後等其他忍唔住手既人做埋，無賴主義者視分數如草介，只求蒙混過骨，最好什麼都不用做，輕輕鬆鬆拿個C或D就心滿意足，如果你責問佢或者忍唔住手做埋，總之有任何帶頭發言既行為，你就會好自然被無賴主義者認定是Leader，而作為Leader，就被默認為做得最多的一位，當你嘗試關心或者責問依d無賴主義者時，佢地通常會裝得很可憐，連忙道歉，然後說自己如何如何沒空或者如何如何沒有能力。

            無賴主義係大學生涯中之一生存之道，大學裡充斥人生百態，為權力、分數、留學機會...太多太多，總之都是關乎己身之利，寫這篇文純粹提提這有趣現象，並沒有埋怨什麼，反正大學如此，社會如此，人性如此，不足怪矣。

蛇懺悔

         今日終於與買家傾談好一切並送走了牠們，前前後後養蛇都差不多有六年時間，好多人會問點解會仲意D咁既野？因為我覺得佢地好特別，可以發展到好多不同紋路色系，同埋我好欣賞蛇，佢地可以不吃不喝半年以上，能夠適當地儲存能量，等待獵物出現；打理亦都唔難，見到大小二便先清理，平時唔洗點理，去旅行都唔會有影響。咁..點解要賣？

        退場既想法大概係一個月前浮現，但因自己既不捨，遲遲與各買家不能達成交易，退場原因係事源自己有種突如其來的想法。首先要提提養蟒蛇，食物多數以科學鼠為主，或許會有人覺得殘忍，但我當時想法係我餵蛇因為蛇需要食鼠維持生存，此仍自然之理，而非殺生，直到近排網上開始流傳有人用狗寶寶餵蛇的視頻，然後好多人都聲討佢，話佢餵狗殘忍，另一邊箱，一班養爬蟲的人又出來發表意見說難道餵鼠又不殘忍嗎？人類食肉又不殘忍嗎？由依一番爭論中，令我萌生出一種想法，蛇食鼠係正常，但是誰創造這般強大的需求？我們欣賞蛇，讓牠們作寵物，繁殖家為了得到更多色系紋路以及賺錢不停繁殖更多蛇，業餘飼養的又多以繁殖為目標，故蛇的數量直線上升，隨即而來是超級強大的食物需求，就這樣，老鼠不停地繁殖繁殖然後不停死去死去，被蛇絞死、用氮氣殺死、凍死、用棍打暈等等，想到這裡就覺得自己是此孽的始作俑者....雖然把蛇賣了，並沒有改變什麼，更好像把自己作的孽轉移給別人，這是我自私的決定，自萌生此想法後，每當我餵食時，都有種於心不忍的感受。

        我把此事告訴給女友聽，她說人也是這樣，為了吃肉不停發展畜牧業，豬羊牛雞鴨鵝不停死死死，我答不上話，只能沉默。

黑暗過後會是晨曦

            事隔差唔多兩年，又樹起條筋寫下野，命題為黑暗過後會是晨曦，事由兩年前我煩惱緊學業問題，現在我已經轉左去中文系，算係比自己一條生路，好多人聽到我轉系都為我感到SAD或者笑下我；其實我都覺得可笑，活左二十個年頭，好多人都認為我適當既時候做唔適當既事，例如我由英國回澳讀書、由經濟轉去中文、讀緊中文又走去學電工等等，我回頭一看，覺得唔錯呀，你睇我幾多故事，幾有經歷，有機會係度分享。

             然後人地通常會問你，讀中文出來做乜？學電工去做三行？其實我都唔知呀，哈哈！讀中文係棄難取易之舉，當然我轉系前同自己講過，必定要運用中文系既"優勢"，到底有乜"優勢"？ 有機會再講。

             作為傻散，當然要講下股票，好深刻記得十六歲伙父親買第一隻股票「電能實業」，第一隻股票同第一次拍拖一樣，總會牢牢記住，心情係好奇又刺激。今年已經第七個年頭，頭五年都係試牛刀，直到近兩年開始有自己既一套，但一直未有機會試，然而，兩個月前機會終於來了；依D馬後炮野我就唔多講。入左中文系一年，接觸到法家思想對我既投資心態有好大影響，依部份要日後開個新POST講。

痴心妄想

         自上大學後，我都無乜時間同心情打文章，今日考完試，有感而發。
         大學既生活我確實喜歡，只係學業跟唔上，或者係我一開始就簡錯系，我讀經濟，但我數學好差，所以讀起上來好吃力，然而，付出唔係必然，努力之後都係唔合格，每次考完試我心情都會好差，會擔心、焦慮、知道自己測得唔好，然後身邊既朋友又不停咁講返考試既題目，甚感難堪。好多人都會問我咁點解要簡經濟？我心目中既經濟同現在學既經濟有好大出現，OK，我承認我後悔了，我做錯了選擇，而且係連續兩次！

        係我第一個學期知道自己唔適合經濟..或者咁講，係依度我搵唔到自己存在既價值，我迷失左方向，我應該轉身離開還是苟延殘喘？碰巧學校有一個轉系機會，我當然立即申請，轉到一個不以數學為主科目，最後結果都係不成功(我申請轉的那個科原來由頭到尾都無打算收人，但又比依個選擇人簡)，意味住我要繼續留係經濟直至年尾才再有機會申請。

         上天恍惚同我開左一個玩笑，到底係我懶還是怎樣？問題出在哪裡？往後的路應該點走？轉系？唔得就轉校？再唔得就工作？一堆問題，尋尋覓覓，到現在我都找不到答案，或許十年後重看這文章，可能會大笑一番，但現在的我真的笑中帶淚，係可笑，多麼可笑......我既讀書生涯好崎嶇，我就快撐唔住...我唔害怕失敗，但我介意令對我抱有期望的人失望。

          路，一直都在，我只能控制自己不去再想，就由時間去揭曉答案，每一條路都有不同既答案，沒分好壞。我成日同自己講做人最緊要開心快樂，因為開心係最貴，所以要珍惜每一個快樂時刻，做自己開心既事，飲令自己開心既飲料，食令自己開心既飯，我所指既貴唔係金錢上，係心靈上既價值。但開心真係愈來愈貴，代價愈來愈大...

        近排我都一直有留意股票，但沒有做什麼交易，都只係研究同觀望，試圖感受價值既真諦，投資真係博大精深，門派多如天上繁星，用藝術來形容投資絕對當之無愧，要學習的東西還有很多，但我對投資股票非常有興趣，賺錢只係投資既副產品，我反而對我既選擇是對或錯更為期待，但又要等時間來給與答案。有時我會覺得人生就係問與答...做人真係好複雜，都快滿頭白髮了...