傻散垃圾投資組合16年7月

話咁快7月就完左，好快就要開學，書要讀，學要返，打後應該無乜時間係度分享什麼，只能繼續更新傻散垃圾投資組合，睇返瀏覽數量最多既都係依類貼，參考又好，想睇我點屎法又好，好多謝你地嚟睇。 如無意外都會繼續用相片，除非部老爺電腦終於玩完，如果覺得張圖太細，可以點擊佢放大 。

現金佔總資產：42.58% 首先，要多謝我地政府慷慨解囊，其次要多謝眾家人既利是仔，因本月是小弟牛一，再細分D就要多謝有幾隻股票派左利息。不過開心還開心，其實我唔贊成派錢，別人看似好好，諗深一層政府只係對火哄哄既經濟加多幾滴油，有次我同朋友講，朋友就話:有得X，你X唔X？，我就無野再講了，因為佢有佢道理，反正D錢唔落我地袋，都會比班官亂花亂用，依個情況下，更係X左先算啦。就好比你有隻股票坐艇，仲要係環遊世界既超級大郵輪，依隻股票既管理層不懂經營，只係識亂洗錢，但你走又走唔到，咁你想唔想佢派息？

 

股票佔總資產：56.89%

本月動作：無

後記：原來我既資產就只有現金同股票，仲有D去旅行用剩既海外貨幣，日後希望可以加多樣，就係樓，我對樓市研究都有一手架！依個暑假我花左唔少時間去研究澳門既經濟，進展都唔錯，就差在幾時可以實踐，至於股票呢，都係一個悶字，所以就唔講咁多啦，至多講一句：傻散垃圾投資組合成員領展創52週新高唔知第幾次，早前放左500股到底揼唔揼春？睇你點睇啦，如果你係食息派，咁都未分勝負既，如果你已經賣出，價又比我高，咁我個500股就輸左比你啦，我好似放乜就升乜咁wo，之前941，341都好似升到洪洪聲，真係要檢討下。今個月好多blogger都有聚會，睇嚟我依個澳門仔都無乜希望可以同人聚，見到大家都話有傾到blogger內容既真實性，令我諗起我個組合其實都欠缺真實性，無辦法啦，考完曬試我先開始寫返blog，就算我現在放個銀行戶口同買賣記錄出嚟，都一樣可以係做假啫，不過唔緊要，長期既更新會令我個組合愈來愈真實，期待之後既買入賣出都可以完整地紀錄係度，等我十年二十年仲有命的話，睇下當年既傻散到底做緊乜。

 

後後記：好多人一見面就問我有冇返工或者去旅行，今個暑假的確無乜搞作，係好多人眼中一定覺得好浪費，我的暑假日常：每日訓到自然醒，嘆個早餐睇下報紙再車女友上班，然後等到中午，陪屋企人飲茶買餸，之後遊山玩水或者訓晏教，有得訓晏教真係好爽，就算讀大學我都堅持將時間表改到可以訓晏教，我諗好多人出來做野之後就無機會再訓晏教。看似平淡生活，其實份外珍貴，或者，依種就係我想追求既理想生活，如果現在就開始過依種生活，以我現有財力好快玩完，所以都係回歸現實，死死氣讀埋大學打份牛工，並且希望依個生活早點來臨，或者到時我會係一個湊仔公:)

總有一天，總有一天，總有一天，回歸價值

          今日無聊開個組合睇下，發現我位老臣子"工傷"終於離傷癒不遠，之前話你係雞肋，係我講錯，點解講錯？唔係因為你股價上升或者令我賺錢，而係你每次都令我想起以前既組合。

          繼「初出茅廬」中既組合之後，其實仲有一個組合，最後先到現在依個，六年時間前後共三個，頭一個係跟風，第二個係價值投資組合，第三個係自己諗既，啦！其實我以前都係一位價值投資者，我讀過書，睇過價值投資大師既blog，我當自己已經係架啦:)，你地講既咩六福、金利來、路勁、工行建行、渣打、澳博、金沙、吉利，我都有持有過架，不過現在已經好少價值投資大師提起啦，以前依D股票好受價值投資者青睞，傾到火紅火綠架，不過最後我個價值投資組合都係爛尾收埸，好彩係爛尾收埸，如果唔係真係蝕死我，爛尾全因大師們幫手，約兩年前佢地筆鋒一轉，整個組合都唔同曬，無人再討論個D股票，出現左一批新既價值指標同新既組合，我見勢色唔對，自己既價值投資組合平均股價都慢慢向下，最後都等唔切收息就清倉，除左"工傷"，因為"工傷"個陣仲賺緊錢，渣打澳博個D更加唔洗講，走慢一日都跌幾千架！最後計埋"工傷"、"不移動"賺既錢，算係打個和蝕少少兼無左年半至兩年時間，諗返起都算撿返身彩。

        現在兩年過去啦，金利來已經跌到$3，路勁依然係$6-7上落，六福吉利上上落落都可能撿到D既(如果你識賣而唔係收息)，渣打澳博就..唔講啦，工行建行都係要識賣先得，我組合個位老臣子已經係經典例子，我既買入價仲要靚過出邊好多價值投資者，因為係佢地買入後繼續跌然後我先買。以"工傷"做個例子，如果我一路揸住收息唔賣，不但要承受好大既跌幅壓力，佢仲要減派息，實際上回報率真係唔高，仲要等等等..等到佢返鄉下，等到依家股價持平，我先賺左息，當然啦，你可以溝貨，然後溝下坐下，總有一天，像這天，都會得到合理既回報，但唔應該歸功於價值投資。我揸左"工傷"咁耐，我都唔明點解要話佢係價值投資股，明明佢就唔係，其實時間已經證明左，現在都無乜人講內銀股啦，但年幾兩年前真係日日講，讚到天上有地下無架！不過係咁架啦，創新高未講lo，跌到殘個D，傻豬，未回歸價值je，總有一天，總有一天，總有一天，佢又會以價值投資股既身份創新高地出現。

        不過呢，雖然"工傷"唔係價值投資股(我認為)， 但佢都係一隻較大型較穩建既波幅股，比起個D高息股已經好多多聲，我見有幾位人兄用高息股做左個組合，仲話每年可以收幾多幾多息，真係羨慕佢地咁有正能量，依D高息股市值細易操控，有D仲係年年借錢派息，一係不務正業，一係業務毫無發展，盈利增長愈來愈少，最慘係想走都唔係咁易，成交額低到無人有，到你想賣個陣就明白架啦。以上都只係我個人睇法，絕對會有錯，只係錯多定錯少，我希望係錯多啦，大家都係散戶，點會想同類死架，開得blog分享就更係想一齊進步，如果交左學費聽埋講座最後都輸到傻下傻下，比著你或我都唔開心啦，希望係我諗多左啦，希望個類高息股真係會有希望。

說出價值

       依幾日客串返舊公司做part time幾日，事關公司有活動，雖然辛苦，但可以同班舊同事做野，的確幾開心，值得既。公司搞活動，一如以往都係車水馬龍，排隊排到打哂蛇餅，客人好似當D貨唔洗錢咁，不停撿撿撿，但明明公司只係減左小小錢兼送下小禮物，客人已經覺得好抵好抵，一輪大亂戰，做到現在先收工，其實我好眼訓，但又想記錄依件事，依種感覺。

        如果你係慳儉既人，一定會說三道四，話依度D野性價比太低，唔會值依個價，而我依D死窮撚，即使出左糧都唔捨得買入邊D野，所以無乜特別感覺，反正自己唔捨得又用唔著，但見D人瘋狂咁買，我都會經常諗『點解？』，注意！唔係有錢人瘋狂買，係連中產或以下既人都會買買買，到底有什麼魅力？就係上年，經過公司既年度大活動，我就找到答案。

       公司每年都會有一兩個大活動，好似今日咁，買野會減下錢送下禮物，然後追尋夢想既人、初創業者、生意佬、或者持住普渡眾生思想既人、又或者都唔知自己做乜既人、又或者渴望成功或想被關注的人，各路人馬係依一日都會使盡渾身解素，佢地既大佬只會問一個問題，如下圖，然後一齊出盡全力做同一件事。

 相信有睇過依套戲既人，都一定會知依句對白，依個咁特別既日子，我簡直係覺得將全澳最頂尖既銷售大佬聚埋一齊，一齊將自己既生意額推上另一個層次，當然啦，做生意同投資一樣係有風險既，大佬其實唔多，佢地說話技巧真係與常人有異，仲有好多方面既細節都增加到佢地既說服力，多得全球既大佬，公司既規範先可以大到咁誇張，所以抵佢地發達。

       有種價值，可以用說話或文字去創造出來，深層點來說，係用說話或文字影響你既價值觀，用一篇又一篇既新聞，一個又一個既例子，一次又一次既實驗，一層又一層既包裝，去話比你知，你無買貴，依樣野係物超所值，係一件好產品，現在唔買你就會走寶，睇完聽完一篇一次既文章或講座，然後你會慢慢覺得自己係所謂既『價值投資者』，又或者開始相信『價值投資』，你無睇錯，係『價值投資』，真正高手係唔會一開始同你講產品，會由宏觀入手，會由你會注重既地方入手，例如你覺得自己既簽名值幾多錢？又或者打正一個大旗號，例如價值投資，你覺得健康值幾錢？你會投放多少資源到健康上？話時話，價值投資真係去到邊都岩用，我唔係指投資方法，係個名，其實每個人都有自己一套價值投資，但絕對會因外界而改變，變好變壞我覺得係可以感受，例如你吸收別人既健康價值投資，身體生理或心理上有變得更健康嗎？又或者你吸收左人地既股票價值投資，咁你買股票賺定蝕呀？依個仲易計啦。

        對於依班高手，我對佢地無乜厭惡感，只係單純覺得佢地好勁，高手最仲意儲人氣，做到教主就最好，瘋狂出書，瘋狂開講座，瘋狂上報紙雜誌，分享心得，教人sell me this pen，話比你地班信徒知乜野先係真正既『價值』，以上幾樣收入來源都十分和味，至於對別人是好是壞，天曉得，反正你情我願，一買一賣都合情合理。

傻散垃圾投資組合16年6月

So9sad..唔知點解今次copy落泥就會變成一堆字，而唔係一張圖，唔想誤左時辰，用手機影左落泥粗粗地睇住先。

現金佔總資產比例：由5月既35.72%升至41.61%

本月動作：沽出500股823

其實有更多更詳細既數字，例如每月多左幾多錢，賺既同儲既各佔幾多，不過我就唔post啦，好似好暴露咁。不過我會keep住更新，有心人keep住睇落去，大約都會知道個數。

今日結算睇返個戶口原來依幾個月都收左幾次息，D息係無計入上圖既組合度，因為計唔到，所以會集合在12月一次過計，印象中16年暫時收左3千幾蚊息，老實講自己唔係太在意D利息，一來本小收唔到幾多，二來唔係靠股息賺錢，關於股息論，我本人較認同流星兄同池兄既說法，有興趣可以去佢地個blog度睇下。

講起股息 ，之前遊逛其他blogger既時候，好似有隻股票好鬼死高息，但我又無乜投資知識，財務報表都唔係好識睇，所以有樣野想請教下大家：

有間公司，將賺到既錢派哂比股東之餘仲要額外攞多少少去派，點解會咁荀既？唔通公司實在太多錢無地方洗？

2016/6/29 股票買賣變動

實實際際，清清楚楚，紙上談兵既野就唔多講，真實操作先有說服力。

略略講下本金少就會有上圖既問題，錢唔多只夠買幾手，到要放既時候，最理想更係一炮過走，但想留部份既時候，就會出現賣一手既情況，感覺怪怪的。更慘既係有D股票你只夠錢買一手....好似以前既1號仔，買左就完全側重。



係發佈前突然諗到D野，如果我一路紀錄，最後成個組合蝕到PK或者沽左既股票升上外太空，咁我未柒到面到黃哂(+_+)

柒就柒啦..咁先好玩！

初出茅廬

         近排個市好悶，指數不停係某個區域來回，唔好同我講琴日跌左好多，前前後後無10%以上既跌幅，我係睇唔上眼。至於生活都幾近沉悶，暑假過緊阿伯式退休生活，朝早嘆完早餐就會去圖書館同班阿伯爭報紙睇，睇完報紙又睇下其他書，睇完書就食午餐，食完要不游水跑步，要不睡午教，係寫意既！但作為一個年青人，無理由咁快過阿伯既生活，所以7月我會返舊公司做幾日pt，然後又報左幾個課程讀，依家想學野都有門檻，兩個課程都要面試再篩選先有得讀，希望成功啦，唔係又要繼續過阿伯式生活。

         紀錄完自己依段咁頹廢既生活，要入正題了，今日睇舊相搵到13年既投資組合，貼係度分享下，個投資組合係個年故意cap低張圖做紀念，係要提醒自己一些錯誤。

13年係好年份，係我初出茅廬既年份，係繼同老豆夾錢買6號仔之後首次自主自付買股票，除左依d股票，係依段時間我仲玩左牛熊，當時真係好多野都唔清唔楚，每日都有好多資訊塞入腦，到底應該信邊個好？有出名既blogger推薦股票、有每日更新既財經消息、有各大論壇既討論、有唔同既投資學派，聽講有個學派叫價值投資，望落好似比較正統同合理，然後就深入d了解，又去圖書館借相關書睇，記得有本野人地話係價值投資既聖經，唔記得叫咩，睇完都係一頭霧水，然後慢慢就跟風買股票，睇完人地講之後，自己都覺得合理(貌似被說服了)就去馬，無論正股定牛熊，初初買股票真係分分鐘都睇實，跌少少就覺得肉赤赤，你知架啦，學生哥有幾多錢，撞正13年個陣較深既跌浪，真係幾日就輸一個月零用錢+兼職，咁既心態買股票，結果如上圖一樣，牛熊唔洗講啦，都係輸既，前後我諗輸左八九千左右，因為我死等，等到正股唔蝕咁多先走，走曬之後，個心真係怕，我安慰自己：早D輸好呀，總好過出來做野更有錢之後先學投資，一定輸得仲甘。後來我反覆檢討，開始慢慢消化每個信息，其間一樣有試過深陷險境，但一次比一次好，打後三年其實無乜大風浪，我覺得咁樣唔好，因為依三年我專注唔係點樣賺錢，係點樣唔輸，同初初既我無論想法、投資方法、思考方式都已經有360度改變，要問我屬哪一派，我諗自己係乜派都睇D，但樣樣都學唔足，左拼右拼就有左自己既方法。

       醜野唔怕話比人知，衰左就係衰左，但唔代表衰一世，所以我保持更新投資組合，我對自己既方法好有信心，無論跌市定升市，我相信亦能處之泰然，現在投資組合既規模比三年前大幾倍，總資產近兩年都能保持30%增長，近兩年股票進帳其實不多，無太大波幅，根本無出手機會，主要係我為人節儉，不亂花錢才有這樣的增長。

       最後要奉勸大家唔好玩牛熊窩輪，唔好沉迷於股海每天每分每秒既廝殺當中，因為你個腦轉得再快，都唔夠市場快。仲有，唔好道聽塗說，自己諗清楚自己決定自己負責，唔好不停推翻昨天的我，買賣初衷要堅定，唔好因為一時消息而自亂陣腳，唔好成日做買賣，仗唔可以成日打架，經常調兵遣將會十分傷神。以上都係鬼唔知阿媽係女人，但就總係要叫阿寶出動。

下邊補返兩張圖係關於「友邦之役」，去證明..... 唔多講啦，get到就get到。

友邦一役

         如果你打算係度睇下小弟有咩高深分析，什麼價值呀技術呀乜乜乜乜，咁你可以禁返出去了，依度無諗住會教人什麼，純粹記事給未來的自己回味，更何況小弟不才，無其他blogger數學咁好，又好少會用心去分析公司，多數都係望兩眼就算，恐怕都係誤人子弟多。我個人認為財務報表不宜太深入了解，一來複雜，二來不代表你真的了解該公司，我見更多人都係弄巧成拙。小弟既投資方向之前已經鳩up左三個大主張，有興趣可以望下，但真正操作方法並沒有公開，如果我搵到屬於自己既發達公式，我更係唔會係度分享啦，更何況未搵到呢:)同埋發達無得教人，教你個個可能因為你而發達，因為你要買佢既書睇佢既blog上佢既班，儲夠人氣之後一傳十十傳百，咁筆數自然唔係咁計。當然啦，理財應有既態度，係可以教授既，但一定唔會令你發達，頂多只叫啟發你發達既第一步。

         講下自己點解買友邦之前，要提提有某些媒體唯恐天下不亂，不斷發低質新聞來影響散戶，邊間就唔講啦，我留意左好耐，儲左好多圖，大致都係不停唱淡唱淡唱淡，升又唱淡跌又唱淡，仲有個幾有趣既新聞，例如索羅斯話經濟唔好，準備做淡，港股股災比08更嚴重，另一個就今日暴跌五百點，索羅斯空襲港女。標題嚇一跳，睇完得啖笑，試問有無人會係偷襲你之前警告左你先？基本上近半年都係咁，最可笑係個市同佢既死老豆新聞走勢係完全背馳。大家如果好似我咁無聊，可以留意下D媒體或者財經新聞，有時真係笑到碌地，但我相信實有班傻人會信到十足十，依D新聞會作為佢買賣既推動力。

         買友邦有兩個因由，一個係自己兼職既地方，另一個就係因為個D死老豆新聞。

我唔係好識睇財務報表，初初見到友邦盈利又上又落，對於我依D傻散真係唔明，加上又咁高PE，然後就卻步，直至我係一間賣健康產品既公司上班，我發現左D係財務報表睇唔到既野，係關於公司既制度，保險公司多數都有佣抽，健康產品亦如是，當然佢地會設計一個好動聽既名或者叫獎金既野去代替佣金依兩個字，基本上佢地係同一類型既公司，而入邊亦會分級數，賣得愈多就愈高級，好似我兼職間公司咁，當你做到某一個生意額且保持幾年，打後你唔做野，公司都個個月都出糧比你，看似動聽吧？仲有低成本創業，基本上靠把口就做到生意。無錯！依個係屬於你既生意，年青人，老年人，企業工抑或清潔工，你們該有一個創業夢，現在機會就放係你眼前，低成本高效益....呀！ 對唔住，離曬題了，無辦法，做左年半，依D對白已經植入我腦海，我想講既係公司既分級分團分佣制度，好容易就會形成一種目標，下層會視上層為偶像而不斷努力搵客，上層與上層各團隊又會互相角力，當成為上層分佣又好和味，權力、榮耀、利益有齊曬，誰不心動呢？ 而依個制度既最大受益人唔係上層，我好肯定係間公司本身得益最多，因為做出成績就等同幫公司搵錢，難聽D講句所謂獎金或佣金只不過係公司出糧比你。講到依度你可能會話，邊有咁笨柒講下就會中個頭埋去，我一定唔會lo。但係事實就係去追依個「夢」既人多到你唔信，講多少少，我間兼職公司既市值拍得住一間友邦，可想而知其威力，可想而知友邦既威力。

我文字上已經不能形容比你地聽個種瘋狂，個種對團隊、公司、偶像既崇拜度係瘋狂到你唔信，我見過好多為左追額，真係自己禁錢出來買野，係好誇張睇到O曬嘴。當我了解到依個事實，咁財務報表略略看下便可，只要機會一到，一有個好價位已經可以買入，係2月3日咁岩有個死老豆新聞，話銀聯限額買保險，當時本身已經日日跌，加埋依個消息友邦開市即插6%，真係大好機會，仲要我一查之下，銀聯限額早就存在，即係掘舊屎出來講，二話不說即刻買！ 一買就返唔到轉頭，個半鐘已經有消息傳出限購早存在，然後？ 然後就離我買入價愈來愈遠....眼訓..再見。