首先預祝大家新年快樂、身體健康！寫上篇個時我以為會忍唔住間唔中寫下，最後都忘記左依個blog，但年結無理由唔寫返篇。
今年可以話係好大改變既一年，我四月份已經搵到正職，五月先畢業，開始邊讀書邊返工，到現在做左過半年，仲慢慢習慣緊工作既節奏。講起我份工，同賭業有超大關連，基本上全澳賭場，甚至東南亞、亞洲既賭場都有機會去，去過咁多場，開左唔少眼界，亦令我作為澳門人感到自豪，論規模、論制度、論財力，我敢講係亞洲無一個地方搞賭比我地搞得更有聲有色。
至於投資，我已經賣曬D股票，但幸運既係我今年仍然有28%增長，比起上年31%倒退3%，咁無左股票、股息，D錢邊度嚟？ 今年既收入分為四個來源，第一個係月薪，第二個係沽空恆指，第三個係做定期，第四係出售股票既盈利(屬一次性收入)，今年有咁既表現都算係咁，來年我保守目標係25%增長。(唔好睇少依D定期，起碼叫100%有錢落袋)
沽空恆指，係我未清倉前已經有既想法，我研究左好耐到底用咩工具，牛熊窩輪期權期指，仲有7300，最後我揀左期指，因為我較為明白期指操作，其他我太蠢睇唔明，就係咁我沽住兩張細期，一路由大三巴斬到去媽閣，直到現在我仍然有兩張細期係手，期指我無記錯係有10倍左右槓桿，但我份人比較老實，除左保證金我再入多十五萬落去，以現價計三萬點左右先會比人追魂Call，但我肯定未到三萬點已經走夾唔透。(沽空唔容易架，大家想沽空前一定一定一定要做足功課，唔好賺得/死得不明不白)
榮辱之戰，我同好友既戰爭仲未完架，目前我嬴個馬頭，但一日未到期限，一日都未叫分出勝負，任何一個條件唔達到都當我輸，有網友話唔好咁認真，老實講我真係好認真，唔係講笑發up瘋，我每一個投資決定都絕不草率，每一個決定都有相應既策略，咁樣輸左先會知道自己衰咩，如果唔係只會一直輸落去。
最後，都要再講多次，沽空唔容易架，就好似依兩日回彈，我由賺七千幾變到蝕五千幾，個波幅唔係人人能夠承受，唔係銀碼上既壓力，係心理上既壓力，要好堅定自己既睇法，只要大勢與你預測既正確，經過月月結算後，你都係會賺錢，但當中經過無數大風大浪。
教人會發達，因為學費袋袋平安，但比人教個個就難講，我無資格教人投資/沽空，但有一句一定人人受用。就係「飲多D水，早D訓。」既肺話...........
「一定要做足功課，一定要設止蝕位，一定要做足功課，一定要設止蝕位，一定要做足功課，一定要設止蝕位。」 真係打從心底既「肺」腑之言，希望大家事事順利，來年大賺，最重要身體健康，二月尾再見。
經過今個月既變動，大家都知道我清左倉，清倉代表咩？
(1)我將燈力全面爆發
(2)我成為淡友一份子
我稱今次為榮辱之戰，好淡對決，誓要分出高下！橫行得唔得？橫行當我輸，今年必出方向！點解？babababa~~我並無能力舌戰群雄，就等時間嚟講出答案好了。
(1)若恆指再創新高，即當我輸，依個blog亦無謂再寫，行返入個山洞繼續學習。
(2)明年今日，我清倉既股票賣出價低於明年今日既股價，亦當我輸，依個blog亦無謂再寫，行返入個山洞好好學習。
依個帖永遠唔會刪除，如果我輸左，歡迎隨時隨地恥笑我
接下來既日子，無咩事我都唔會再寫blog啦，係適當時候我會造淡，但交易操作唔po啦。
馬後炮： 其實個日清倉，係做得心急左，因聽日我就去旅行，心理上都想拿拿林一乾二淨。我去完旅行返嚟就諗..的確有更好既處理方法，又學到野啦。
仲有工行都賣埋啦，由第一篇blog到現在埋單賺左幾多？我真係無計，因為懶，我最憎計數
諗緊好唔好係度停，唔再寫，或者咁樣對我嚟講就係最好既結局...
等我去完旅行返來再算啦。
$68.15 沽出500股 823
係學校唔方便，今次唔update相了
現金佔總資產：63.05%
股票佔總資產：36.33%
本月動作：買入173
後記：
去到畢業最後一個學期，唔知點解變得好懶散，論文唧牙膏既進度，直頭唔想做，但又必須要做....救命。我可以用一日時間去研究舊屎，但對住份論文十分鐘我就已經想死，依個就係興趣既分別。
下星期去旅行，畢業前同不同既朋友去旅行，今年應該去三轉，大出血就預左，因為畢業之後可能約食飯都要約一年半載，咁現在去旅行留個回憶，即使之後變返陌生人，都如願以償。
講返舊屎，小弟已經有曬全盤計劃，最擔心係旅行期間要做交易，現在非常時期，舊屎必須要睇實。
最後，當我坐穩100萬，我就唔會再更新，改為隨意，100萬唔代表D咩，但個段時間，應該已經踏入人生另一個階段，到時好多野都會改變。妨且依個blog只對我有意義，除左比自己回味下之外，當初show出嚟係想諷刺下D人講一大堆大道理，但又無乜實證，D買賣虎頭蛇尾，神出鬼沒，無啦啦話自己係低位已經買入乜乜乜，到插曬水個陣，又隻字不提，又話早就賣左。不過後來我睇化左，反正唔關我事，無謂阻人發達啦。
現金佔總資產：68.95%
股票佔總資產：30.4%
本月動作：無
後記：
今年總資產增加了31.91%，支出比上年多左16.55%，主要原因係小弟買左部相機。
睇返四年前既總資產，令我諗起當年大學一年級同朋友豪言話自己到畢業個年要儲到100萬，朋友只係冷冷地答左一句：ON9
現在離畢業仲有半年都唔夠，離100萬仲有段距離，我屈指一算，如果我無病無痛死唔去，兩年內應該無問題。
今年恆指由兩萬直上三萬，皆大歡喜，樂也。
今年有至親過世，笑喪，百感交集，仍未習慣。
買相機一事，兩年前已有想法，久久未下決定，直至家人別去有感...
上個星期去完越南旅行，我覺得有下次，物價尚算便宜，係交通費最貴，夏天去會更好，因為重頭戲應是潛水游水食海鮮。有些越南女生很漂亮~~噓噓噓
祝大家身體健康，新年快樂。
現金佔總資產：69.58%
股票佔總資產：29.68%
本月動作：無
後記：
今個月好忙，忙交功課、Presentation、論文，現在又要準備考試，要照顧屋企人，好攰。
今年既支出應該會係歷年最高，畢業嘛，準備去兩轉旅行，十二月去第一轉，仲準備買部相機，做偽文青...
至於個市，人人有錢賺，皆大歡喜....下個月再講，依個月身心疲累，天氣又轉涼，大家記得多留意天氣，多點休息。
現金佔總資產：70.85%
股票佔總資產：28.43%
本月動作：無
後記：
業績好外界期望高，中國平安又破頂，研究左一下，經此一役，對於沽頂，我有個好少少既方法。朋友日日潤我，仲教我升市勿沽頂，大大碌馬後炮轟炸我。
現在個市超符我想像，我都唔敢再沽貨，放心，我唔係比中國平安影響到，我只係認為依個唔似係火箭升空，似係要蓋座衛星係太空，但要我追貨我又無把握，7成資金放係度我又唔係好願意，上網睇做定期低到唔恨，唔知面對面問會唔會高D息? 上大陸做定期會高息D，但要螞蟻搬家仲有匯率風險(唔係講笑，如果你前幾年攞去做期，我諗都係打個和，但銀行就多謝曬你)，其他投資途徑唔熟一定唔掂。
輾輾轉轉我又返返去股票度，所以近排我研究緊仲有咩值得買，搵左幾隻細價股，再睇定D先，仲有D未跟上既藍籌，都可以考慮下，但如果比我搵到合適既定期，我會做一半先，不竟事情發展到現在，已經超出我能力範圍，食花生學野亦不為過。
現金佔總資產：71.3%
股票佔總資產：27.91%
本月動作：無
後記：
開左學一個月，今個學期修多左科，所以有點吃力，幸好有個國慶假期可以緩衝下，宅係屋企做下功課寫下論文。話說今年畢業年，好多人都開始諗定要搵咩工，其實我都諗定左，都係一份牛工仲要輪更，總之唔係坐足八個鐘既我都可以接受，可以預計既係當我搵到工，我整個資產都會進行高速增長期，因為本金少兼多左收入，自然gogogo。講起收入，今個月受惠於每年一度掩口費，所以現金多左dd。
股票方面，收左肛交所利息，今年收息小左，主要係因為賣左一半既股票。其實現在都已經好少睇股票，連研究都無做，每日睇下升跌幾多點就算，總之無事唔好搞事，有事唔好怕事，日日睇住又研究依樣個樣，個人一定會心癢癢，好易奶野架。
現金佔總資產：70.04%
股票佔總資產：29.4%
本月動作：無
後記：
今次天災，幸好只浸壞左架車，全家人無咩大礙，僅財物損失，真係不幸中之大幸，感恩。回想當日打算將架車推到高D既位置，點知水位高得好快，眼見架車已經入曬水，個天又係咁飛D野落嚟，玻璃砂煲罌罉榴槤乜乜乜，當然命仔要緊，掉低架車即刻跑返屋企，災後由於住舊區，好遲先有水電，一日走幾轉攞水，已經力盡，小便十幾次都唔捨得沖廁，屎都唔敢痾，真係畢生難忘。
上星期已經開學，又開始忙啦，今年唔打算搵兼職做，又要寫論文，又要應付本科以外既野，唔想比太大壓力自己。
股票方面，真係燈力十足，我係未可以開班授徒啦:) 上個月有師兄留言話無謂計賺少左幾多，我係度答返：最主要係記錄長揸會唔會跑嬴我既操作，如果長揸跑嬴我既操作，咁我可以慳返D腦汁。我既意向仍然係繼續升就繼續賣，我覺得之後買得返既機會好大，另外見到位blogger已經好耐好耐無更新，我雖然與個位blogger素未謀面，但都希望佢一切安好，希望佢只係忙而唔寫blog，最後，如果你睇到既話，我想同你講：2800既大門永遠為你我打開。
與其沉淪於"表"與"內"既分辨、無數既計算和思量，倒不如接受自己既懦弱、無知、貪婪，然後用最簡單既方法去打開大門。
現金佔總資產：69.05%
股票佔總資產：29.86%
本月動作：沽出1000股2318@55.25
後記：
唔知係上天安排，還是機緣巧合，先有老王兄介紹"How Adam Smith Can Change Our life"，後有早月兄關於與人相處既文章，今日係討論區有人分享http://ncase.me/trust/依個網扯關於The Evolution of Trust，三樣偉物講既野都非常相關，比到我好多思考，有興趣可以了解下。
至於股票方面，燈力十足，希望繼續升啦，我仲有貨賣，要錢唔要貨，我能力就係得咁多，無乜好後悔，反正我唔會同股票過人世。...雖然講係咁講，但唔係放左就唔講唔理唔提，我地仲需要賽後跟進同檢討。
圖中係我總結過去賣左既股票，紅字代表我賺/蝕小左幾多，自問平凡人無能力精準估頂，所以賺小左部分我可以接受，突如其來既好消息利好股價而賺小左，我都可以接受，但如果無事發生而賺小左>15-20%，咁我就認為需要檢討方法係未夠完善，至於點解係>20%，其實都係憑感覺寫出嚟，無乜數學根據，單純覺得miss左咁既升幅，已經唔係估錯頂，係計錯數。如圖所見，823就係計錯數，需要開個file跟跟佢，其他會唔會繼續錯落去，有待時間驗證，股票就係咁好玩，好想快D知道結果，真係諗起都興奮，嘻嘻！
現金佔總資產：62.03%
股票佔總資產：37.49%
本月動作：沽出2000股2388@39
後記：
今個月中銀創新高，即刻叫佢撿野走人，將來係點無人知，如果你曾後悔自己當日做錯決定而賺小好多錢，請你記低自己依一刻既感受，咁你就知道有D野係你就永遠都係你，唔係既永遠都唔係。
暑假開始，充實中留少許白給自己發下夢，每日習慣餵魚，呀，我成功繁殖左魚仔，但好難養，我仲摸索緊。餵魚，學英文，打機，返工，運動，大致上都係依幾樣活動，對於無語言天份既我，學英文有如逆水行舟，不進則退，認真攞命。至於兼職唔錯，同事很好，又有野學，CV終於有野寫下，哈哈。可以預見接下來兩個月，都應該係不停做依幾件事。
投資方面，我發掘到一個新投資方法，將來會運用係盈富基金，至於其他股票將沿用舊方法，暑假真係特別有靈感(其實係特別有時間)，希望依個方法可行啦。
等我再發功，幫恆指"燈"上另一個高峰，39蚊沽出全部中銀香港。
現金佔總資產：49.44%
股票佔總資產：50.04%
本月動作：沽出1500股2800@25.8
後記：
關於之前話要分享某教授既有趣事，最後決定打消依個念頭。
一到暑假，就好自然過上舒適自在既生活，除左打機，仲會行山、跑步，近排仲多左樣興趣，就係養魚，養魚真係一門大學問，買魚前就要先將水養好，水質好魚就自然精神，現在每日都會花半個鐘吸屎、餵糧，得閒又會對下魚，欣賞下佢地既雄風，依種鬥魚一見到同類就會起鰭，放埋一齊仲會打，所以都係單獨養。
睇返上年暑假時候寫既BLOG，發現上年同依家過既暑假生活都係差唔多，哈哈，我就係咁死板，我好仲意行山，春夏秋冬去行山都會有唔同感受，大自然真係人類最大既寶物，我去行山最主要係想吸下新鮮空氣同埋觀察大自然循環，澳門D空氣質素太差，人多車多吸入肺既都係廢氣、油煙，偶爾仲有幾口二手煙索下，我揸老電一定會帶口罩，如果唔帶就會成面都係黑色既塵，真係好恐怖。
上年六月放左823，今年五月放2800，現金既比例愈來愈高....哎，一講到股票真係無乜野好講，方法又死板又悶，十年都唔分析一次，年報又懶唔想睇，所以都係聽天由命啦，升或跌都無乜所謂，唔好半浮半沉就得啦。
依條係我暫時養過既鬥魚中最靚既一條
今朝沽出1500股盈富基金 ，本來想沽2388或2318，但經我深思幾日之後，決定先沽出盈富基金。
睇返上次沽823，真係衰左，唔知今次會唔會衰埋呢，嘻嘻
唔沽2388或2318唔係我認為佢地仲有得升，我只係怕買唔返，不過個市繼續升，又唔同講法，但我覺得短期再升既機會不大。
以上都係我隨便講，你睇我放823就知我無乜料到，投資要自己負責任，切忌道聽途說。
現金佔總資產：44.21%
股票佔總資產：55.25%
本月動作：無
後記： 今個月月中終於完成曬所有進修課程，總算有多少少自己空間，好彩學校D報告都係月尾先交，等我有足夠時間去應付，下個月就係考試週，咁又一個學年。講起學校D野..(本來打好左，都係等考完試先紀錄低，防止方丈見到後找我算帳)。
今個月仲去左香港，同爸爸去接佢既新玩具，順道探埋親戚。
(回字型屋邨，唔知點解諗起Juno套彊屍，然後寒左一寒，住係山腰，空氣好過澳門十倍八倍)
(就係佢令到爸爸食唔安訓唔落，一到貨就即刻趕去香港攞)
(扲到返澳門，成品圖)
爸爸踩單車都算係澳門威風過，仲記得當年佢撿屋，D獎盃獎牌多到要掉，相反佢兒子傻散有點遜，遺傳左爸爸既粗腳瓜粗腿，但發育時期少做運動，所以最後變左矮冬瓜。部車返到澳門，親戚們都會問幾錢，通常講完價錢，佢地都會O左嘴：哇，依個價錢買部私家車唔好...。作為兒子我係十分支持爸爸係應付到既情況下，投入自己既興趣，興趣係一件好偉大既事，好多人會覺得未又係單車一部，有咩分別，但爸爸係依方面係專家，佢真係講得出有咩分別，對車架尺寸、高度、胎壓、騎姿都深究到底，為左踩得快D？非也，我覺得佢既心境仲停留係運動生涯既黃金時期，即使佢依家唔會比賽，佢都要追求比賽既規格，因為佢過去、現在都係專業既運動員。講到依度，我有點自愧不如，我都唔知自己有咩興趣，夾硬講的話，就係研究股票、樓市，我閒時都會做下運動，但說不上興趣，我興趣到底係咩...人係未一定要有興趣....真是煩。
最後講股票，上個月話想賣中銀香港，點知比我燈左，今個月輪到友邦帶飛，我都想賣架，睇下又燈唔燈先。恆指唔上唔落就最考人耐性，好彩我有王者榮耀，所以近半年都無再研究股票，幾日先睇一次D股票價格，不竟已經有套固定方法，又未得到時間既驗證，再研究落去只會愈搞愈亂，坐定定打鋪機唔好？
現金佔總資產：43.95%
股票佔總資產：55.54%
本月動作：無
後記：好忙碌既三月終於過去，返大學、返實習、返課程整個月無限循環，去實習初頭好緊張，因自身能力唔太高，唔知自己做唔做得嚟，好彩最後都順利過去，對賭場既運作又多左層認識，最開心係實習完左，老闆比機會我去做兼職，等我係依一行攞多D經驗，將來入行就會比其他人有優勢。完左依個學年我就唔讀個D課程啦，乜都讀夠啦，我會轉去讀英文課程，我會用大學最後一年既時間去學英文，英文太重要啦，唔學唔得，但我學語言好差，到時再算啦。
實習完左，回頭一看，唔經唔覺就行左咁遠，由發覺經濟系唔啱自己-->然後轉系->轉系時向自己發誓一定要搵樣野嚟學，要好好運用中文系既''優勢"(讀澳門既大學應該知我講咩)->機緣巧合下接觸到課程->然後一直讀讀讀，讀讀下學校又比機會我去實習->實習完又有機會做兼職，成件事好似發左場夢咁。滿足既係無浪費到時間，雖然唔知自己對咩感興趣，但至少我都學左D野；遺憾既係少左時間陪女友、陪家人、陪朋友，近排仲迷上左玩王者榮耀，真係不要得~~~不要得呀~~(但我都會繼續玩xd)，有時完成左一天既工作，靜靜地坐係梳化玩幾鋪王者榮耀，可以話係我全日中最放鬆既時刻。
最後講股票，無乜動作，睇左幾頁業績，我D股票業績都唔錯啦，今個月都無乜點留意股價，因為真係好忙，返到屋企已經唔想再用腦(掛住玩王者)，今日見到中銀香港盈利高左一倍，之前好想賣但一直唔啱價，今次可能真係會到價啦，哈哈。以上都係傻散既片面之詞，傻散無咩投資大道理，又無詳盡既分析，純粹亂猜亂撞，大家睇下就算，唔好當真，自己投資，自己負責。
現金佔總資產：43.43%
股票佔總資產：56.08%
本月動作：無
後記：
2月無病無痛又過左，股票有留意其他銀行業績好似麻麻，唔知中銀香港同內銀又會係咩樣呢？不過我個組合都幾捱得，A跌B升C跌D升，有考慮過要出少少貨，但基於現金太多，都係觀察下先。
嚟緊3月應該會好忙，忙學業忙實習，有幸讀完課程被選中去實習，有D驚又有D期待，希望可以順利渡過。
有時係度諗，我經濟轉中文系，之後副修維修，但自己最感興趣係股樓投資，都唔知自己做緊D乜，唯有咁樣諗->讀中文攞沙紙，讀維修將來出嚟就做維修(有實習經驗有證書入職機會大好多)，然後賺到既錢就攞去投資(興趣投入)，時也命也，將來直接做關於財經金融或理財既工作機會已經好微，單單不是相關科目畢業已經輸哂，不過呢，人算不如天算，可能天降一個機會，將來我真係可以做一個9up財演呢，又或者幫C奶阿婆落盤兼吹水既經紀，嘻嘻。
我一直無將我既興趣(炒股票炒樓)話比屋企人知，因為覺得超級奇怪：爸爸，我好仲意炒股票架。姑媽，我炒樓都有一手架。係依度你地會覺得依D係投資保值，但係現實大人眼中，我依個臭靚倞去投資，就即係炒股票，即係賭錢，即係掉錢落咸水海，所以我決定隱藏實力，直到搞出成績為止，一定要記住：潛龍勿用。再贈多自己一句 ：知唔知點解成功既人先有語錄？因為曾經失敗既人再有道理，人們都覺得係放屁，而成功既人放個屁，人們都覺得係道理。成功人偷笑傻散：我只係唔小心放左個屁，你地以為我要投資煤氣股，哇哈哈。巴佬手持既指揮棒，即使唔用價值投資，隨便點隻股票都可以賺錢，因為聞屁者多如天上繁星。 講住咁多先，下月再見。
