傻散垃圾投資組合16年12月

現金佔總資產：44.76%

股票佔總資產：54.71%

本月動作：無

 今年成績：

後記：今年總資產增加了33%，會升會跌既股票盈利佔左差唔多一半比重，可見我今年落自己袋既真係少之又少，主要原因有二，一係今年去左兩次旅行，導致今年支出係上年既兩倍有多，二係不停進修，兼職返得好少，說穿一句，今年如果唔係股票同老豆撐住我，其實唔係賺得好多錢，股票一日唔賣，都仲有變數，話唔埋出年跌跌下，上年既盈利就無左一半，所以我比較著眼真係已經落左自己袋既有幾多，至於老豆，仲記得數年前我仲讀緊高中，佢知我已經有買開股票，有日突然話比舊錢我(講到一舊舊好似好多錢咁，其實好少架ja)，叫我幫佢滾到一百萬再比返佢，個刻我心中有好多疑問，老豆你咁信得過仲讀緊高中既傻散？先唔講我賺唔賺到錢，你就唔怕我攞曬D錢去溝女、追潮流、買自己想買既野嗎？老實講筆錢對於仲讀緊高中既青少年嚟講真係好大舊，老豆你就唔怕你個仔用錯地方嗎？雖然我好想問，但最後覺得問嚟好奇怪，所以作罷了，其實我唔係好了解我老豆，我好細過就跟阿嫲住，同佢好少機會相處，所以我地好似無乜話題咁，加上大家男人老狗，好難有什麼溫馨說話，不過我都覺得好幸福，我知道佢一直支持我、關心我，只係唔講出口而已。

又離曬題啦，講返我個blog，今年最多人睇既竟然係『教人投資，我有一套』，我諗大多數人睇都係想知我點樣有一『套』，令你們失望了，依個blog從來都無打算教人什麼，只供我自己記錄而已，我想法依然係發達無得教人，教人個個先會發達，比人教個個唔會，但學習基本知識對自身投資是有幫助的，令人少踩一些無必要既陷阱。夜啦，聽日仲要返工兼倒數埋，總之今年算係不過不失啦，我唔係好識計點樣先叫跑嬴大市，我就會將前後兩年各自既高低位加埋除2取得出兩個平均數再計增長率，如果咁計恆指今年好似比上年更差，個個都話2017年係變幻莫測既一年，我就覺得年年都變幻莫測，只求平安渡過，大家都健健康康，小病小痛就最難幸了。

韓之旅後記：第一次同女友跟團去旅行，多數人都會覺得怪怪的，因為多數情侶或後生仔都仲意自由架啦，但其實今次跟團都係逼不得己，因為無時間計劃又無搶機票，左計右計發現跟團仲抵過自己去，所以就跟團去了。出發前對於跟團我都有些擔心，例如會否逼你買野、住同食會唔會好差、會唔會同好多內地人同團等等，後尾出發後感覺都唔錯，唯一覺得差既就係用成日帶我地去行五六間免稅店，而明洞、東大門依D購物點卻只有一兩個鐘時間逛，而較好既就係唔洗自己搵路，嘆住暖氣遊景點，對於我地依D懶人，真心覺得唔錯，要知道韓國得一兩度，係出邊行耐少少都成個人僵曬，所以下次唔跟團都可以考慮租架車周圍去。以下是女友的「味精圖」，女生們都好仲意將D照片整到好唯美。其中一張係我係飛機度影，只影到幾粒野，其實係有二十幾粒星星，但唔知係光線問題定點，只能對焦一部份，咁大個仔都未試過見到咁多星星，其實我有幾刻懷疑自己係未太累，視覺出現問題，或者發夢。總言之整個旅程都覺得唔錯，價錢公道，又唔洗Plan，又唔洗搵路，又唔洗長期捱凍，就係我地依D懶人既福音，係未呀？

 

 

 

莫生氣

         終於考曬試，總算能夠鬆一口氣，等去韓國旅行，對上一次去韓國已經係三四年前既畢業旅行，個陣去完覺得無乜特別，可能學校資金有限，伙食都非常差，餐餐都泡菜同一碟肉，認真口淡淡，不過可以成班同學去，都係一件開心事。現在同學們已經各散東西，甚少聯絡，係有時會有班聚，但都已經愈來愈少人出席了。

         琴晚有位舊同學生日，當然要請佢出嚟食飯，大概都係談談近況，寒暄幾句，食完再去遊車河，遊過我地既學校、以前曾經一齊玩既公園、酒店、籃球場，心頭有過一絲涼，只感歲月如梭，大家都長大了，然而，下次見面又唔知係幾時，當大家都出嚟做野既時候，想見面既機會就少之又少，我諗生日係一個最好既原因約出嚟見面。其實我之前都唔會去記人生日，用腦亦都記唔住，但就係覺得有D朋友，間唔中點都要見下，所以我將佢地既生日日期寫左係本薄度，好讓自己能夠請佢地食飯兼見面。

        遊度咁上下佢就車我返屋企，因為大家都要睇"致命復活"，就係我落車無幾耐，我就同人地發生左一場爭執，其實只係一件好小既事，但係因我既衝動，覺得佢講野好唔禮貌，我就講左句粗口，令依件小事升級，最後仲差D打起上嚟，幸好我衝口而出之後，尚有半點冷靜，我見朋友不停道歉，而佢一直步步進逼，仲話要同我單挑，我立即向後行同佢保持距離，最後我坐朋友車走左。上到車朋友話好驚我同佢打起上嚟，都唔知點處理，我現在諗返起，真係好彩無打起上嚟，否則韓國旅行就好大機會泡湯，到時仲要比人笑，因為D咁既小事而動干戈，真係半點兒都唔值得。琴晚我因為依件事都有少少失眠，我諗其實我係較錯個位，唔應該如此衝動，因別人既不友好而咒罵人，如果我再遇到佢，我諗要同佢講聲對唔住，但我女友話唔好，話唔好再同人地有接觸。我諗隨緣吧，如果佢找我破口大罵，我就會同佢道歉；如果時間可以沖淡依件小事，我仍希望自己會永遠記得依次教訓。


以下奉上"莫生氣"比大家，我自己都睇左十幾次，仲打算縮影放落銀包，同手機Wall paper，
希望可以警醒自己，唔好到鑄成大錯先識後悔。